Jólaalmanak heimilisins - 7. desember

7. desember

Í dag kveikjum við á öðru kerti aðventukransins og öll fjölskyldan skrifar jólapóstinn sinn. Það sakar ekki að eiga eitthvað til þess að narta í meðan setið er við skriftir. 

--------

Hvað á að núa manni þessum jólapósti mikið um nasir? Nei, ég bara spyr?

Við héldum afmæli í dag og höfðum jú svo sannarlega eitthvað til þess að narta í. Hér eru svipmyndir frá deginum. 

Afmælisbarnið með "litla sinn". Bríet er óendanlega dugleg að druslast með hann daginn út og inn. 

Þessir eru flottir - strákarnir mínir og afi Oddur. 

Ég tárast alveg yfir þessum dásamlega hóp sem ég á - finnst stundum svo óskiljanlegt að ég eigi þessi fjögur heilbrigðu, duglegu og fallegur börn. Ekkert, ekkert er mikilvægara í gervöllum heiminum. 

"Ljósið"

Stubbur að máta jólabuxurnar frá Jónu ömmu á Eski. 

Heimsmálin krakkar...

...geta bara verið frekar spaugileg. 

Í dag var megrunarlausi dagurinn. 

Haffi frændi, Kristófer frændi og Emil. 

Þessar tvær. Þær eru frekar mikið uppáhalds hjá mér. 

Mamman mín. 

Góður dagur að baki. Svo mikið huggó að eiga afmæli á aðventunni. 

Jólaalmanak heimilisins - 6. desember

6. desember

Eldhússkáparnir eru á dagskrá og ef einhver tími er aflögu þegar allt er komið í röð og reglu í þeim má líta í bækur og blöð til að finna uppskriftir af smákökum til þess að baka eftir helgina. 

--------

Þá eru það eldhússkáparnir. Ég verð að gera afar slæma játningu. Ég er búin að taka þá í nefnið. Alla. Sem og alla aðra skápa og skúffur heimilisins. Mikið agalega vildi ég vera laus við að finna mig knúna til þess að vera alltaf með þetta innra skipulag.

Hefur fylgt mér alla tíð. Kannski af því ég fylgdist með mömmu með þvegilinn og tékklistann á lofti hér í denn. Eldhússkápar - tékk. Veggir í svefnherbergi - tékk. Gardínur í stofu - tékk. Loft í gangi - tékk. 

Ég er reyndar ekki svo slæm, en allt að því. Finnst bara svo agalega gott að hafa allt í röð og reglu í skápunum. Er þó hægt og bítandi að reyna að venja mig af þessari áráttu.

En, dagurinn okkar helgast afmælisundirbúningi heimaSÆTUNNAR sem fram fer á morgun með smákökubakstri og fleira tilheyrandi. 

Sæl að sinni.  

Jólaalmanak heimilisins - 5. desember

5. desember

Nú er best að koma öllum jólapóstinum til útlanda og skrifa þeim bréf sem eru fjærri ættingjum og vinum um jólin. 

--------

Æji já. Ég hef áður viðrað þetta hér. Þetta með jólapóstinn. Það hefur hvorki gengið né rekið með hann undanfarin ár og svo virðist sem upp sé að renna fjórða árið sem jólakortin klikka. Það er þó alveg með hreinum ólíkindum, þar sem ég á fjögur fegurstu börn heims til þess að gorta mig af. Sjáum hvað setur, það er ekki öll nótt úti enn. Alls ekki. 

Hinsvegar, þá er Emilinn okkar hálfs árs í dag. Tíminn er svo ótrúlega fljótur að líða að það er hálf óhugnarlegt. 

Kraftaverkamaðurinn Róbert.

Það er hálft ár síðan ég vakti verðandi föður, aðfaranótt 5. júni, með þessum orðum; "Ég held ég sé að missa vatnið." Gísli þaut upp og sagði; "Ertu viss um að þetta sé vatnið?" Ég svaraði því til að ég væri í það minnsta ekki að pissa á mig. 

Við tókum strax ákvörðun um að hringja í sjúkrabíl þar sem börnin mín hafa ekki látið bíða lengi eftir sér frá fyrstu merkjum og verkjum. 

Gísli; Konan mín er komin í fæðingu, hún er búin að missa vatnið. 

112; (Eftir ráðleggingar hans til handa) Við komum. Viltu biðja hana um að fara úr nærbuxunum. 

Gísli við mig; Þeir vilja að þú farir úr nærbuxunum. 

Ég; Iiii, nei - ég er ekki að fara úr nærbuxunum!

Gísli við 112; Það er eins og ég hélt, hún vill ekki að fara úr nærbuxunum. 

Það er hált ár síðan ég suðaði stanslaust í sjúkraflutningamanninum alla leið á sjúkrahúsið (frá Reyðarfirði yfir á Neskaupstað) að gefa mér mænudeyfingu. Varðaði akkúrat ekkert um að hann hefði hvorki kunnáttu né réttindi til þess. Reyndi að selja honum hugmyndina með sálu minni þar til við renndum í hlaðið. 

Það er hálft ár síðan ég sagði Gísla og ljósmóðurinni að ég ætlaði að skíra barnið Róbert, eftir svæfingalækninum sem gaf mér loks mænudeyfinguna. 

Það er hálft ár síðan að litla yndislega kraftaverkið okkar Gísla kom í heiminn, fimmtudagsmorguninn 5. júní klukkan átta. Reis upp eins og selur á sinni fyrstu mínútu í hinum stóra heimi og rak upp það háværasta öskur sem heyrst hefur í nýbura. 

Þrátt fyrir að Emil hafi vissulega reynt á þolrifin siðustu sex mánuði erum við óendanlega ástfangin af þessum litla síbrosandi orkubolta okkar. Það eru forréttindi að fá að vera foreldrar hans. 

Jólaalmanak heimilisins

4. desember

Í dag gerum við jólaáætlunina okkar, skrifum niður það sem gera skal til jóla og það sem er frá strikum við yfir. 

--------

Þarna er ég algerlega á heimavelli. Bara eins og Liverpool á Anfield - já nema mér kannski gengur yfirleitt aðeins betur með verkefnin en þeim. Held þó að það borgi sig alls ekki fyrir mig að fara nánar út í þá sálma hér. 

Minnislistar, eða ToDo listar eru mínar ær og kýr. Ekki bara fyrir jólin, heldur bara alla daga ársins. Er með þá út um allt, yfir allt sem ég geri. Í bókum, blaðsneplum, á ísskápnum og handarbakinu. Þannig hefur það alltaf verið. Finnst allt vinnast betur þegar ég er með yfirsýn yfir verkefnin. Svo finnst mér ég svo voðalega dugleg þegar ég get strikað yfir atriðin. 

Fyrir ættingja skal það tekið fram að innihald þess lista þarf alls ekki að endurspegla raunveruleikann - hann breytist stundum ansi hratt. 

Ég hef alltaf verið óttalegur skipulagsfíkill, eins og miðarnir bera með sér, en hef síðustu mánuði reynt að tileinka mér núvitund - að vera í deginum í dag og njóta. Við Emil skelltum okkur í langa göngu eftir hádegi. Það eru forréttindi að geta labbað í svona fallegu umhverfi. Emil hraut að vísu í vagninum meðan ég naut ótrúlegrar veðurblíðunnar, nýfallins snjós og jólaljósa. 

Jólin koma þrátt fyrir hálfkláraða lista. 

Njótum dagsins í dag til fulls í stað þess að hugsa um morgundaginn. 

Það er lífið. 

Carpe diem.

Jólaalmanak heimilisins - 3. desember

3. desember

Ef það er fyrirhugað að taka permanent fyrir jólin er heppilegt að gera það núna. Einnig að panta tíma á hárgreiðslu- og rakarastofu fyrir jólin.

--------

Svo hljóðar hið heilaga orð. Takið postulegri blessun. Eru ekki allir örugglega búnir að panta sér permó? 

Helena og ég sjálf, kasólétt af Emil.

Ég bý svo svakalega vel að eiga frábæra vinkonu sem er hársnyrtir, hana Helenu mína, eiganda Exito hár hér á Reyðó. Það er vel, þar sem ég er með óttalegt vesen þegar kemur að hári. Já, sko alveg óttalegt. 

Ég veit ekki hvað ég hef skrifað margar hár-dilemmu-færslur hér, þær eru þónokkrar. Til dæmis þessa hér. Á mynd tvö má einnig sjá okkur stöllur. Þarna hafði ég tekið skyndiákvörðun, fór í greiðslu fyrir þorrablót en kom út með allt aðra klippingu.

Hárklípa mín fer alltaf sama hringinn. Bara eins og sólin. Oftast snýst málið um að safna. Safna og safna hári. Verulega fer þó að síga á ógæfuhliðina þegar á að ná toppnum niður. Ó mig auma. Finnst það bara ekki hægt, af því það er ekki hægt. 

Er með sléttara hár en allt sem slétt er. Og stífara, segir hárgreiðsluspekúlantinn. Það er ekki góð blanda þegar kemur að því að reyna að hemja herlegheitin í síkkunaraðgerðum. 

Því gerist alltaf það sama, svona sirka þetta; 

Ég læt klippa á mér toppinn, þveran og þungan. Yfirleitt. 

Ákveð fljótlega að safna, það gangi ekki alltaf að vera með topp. Langar að safna síðu - jafnsíðu hári. Alveg niður á rass. 

Þegar ég er komin nokkuð áleiðis, toppurinn kominn fyrir augun og ég farin að henda honum upp í teygju og lít út eins og Mía litla í Múmínálfunum, þá guggna ég. Bugast. 

Fer til Helenu, sem ég hef þó tekið heilagt loforð af að láta ekki klippingu eftir mér. Síðast reyndi hún að malda í móinn. Sendi mig tvisvar heim eftir einn kaffibolla. Í þriðja skiptið beitti ég fyrir mig hótunum - sagði það lífsins ómögulegt að vera bæði ólétt OG með ljótt hár - já og ég færi bara í Egilsstaði í klippingu en hún væri með þessa stæla. Þá lét hún undan, skíthrædd um að ég myndi missa vatnið á "stofu-gólfið" af æsingi. Aumingja vesalings vinkona mín. 

Sagan endar alltaf eins. Hef ekki áhuga á síðu hári. Fer í klippingu. Þá meina ég klippingu með stóru K-i. Mig langar að "vera með klippingu" - ekki "söfnunarklippingu". Á því er stór munur krakkar. 

Ég var einmitt á Exito hjá Helenu í gærkvöldi þar sem hún var að útbúa allskyns gjafapakka fyrir jólin. Hún pakkaði inn og ég horfði á. Og borðaði konfekt. Fín verkaskipting.

Vorum einmitt að "breinstorma" um jólaklippinguna mína sem ég fer í 12. desember. Vá hvað ég hlakka til. Svo sem ekki mikið nýtt undir sólinni í hugmyndavinnunni, kemst ekki langt frá þessum "þungu". Nenni heldur ómögulega að lita á mér hárið, en það hef ég ekki gert í sex ár. Langar það af og til, en hætti svo alltaf við. En, við ætlum að gera eitthvað skemmtilegt klipperí eftir níu daga. Ó, gaman, gaman! 

Agnarsmátt brot af Id vörulínunni. 

Helena var að taka inn svo spennandi vörulínu, danskt merki sem heitir Id HAIR. 

Fyrsti kosturinn er að vörurnar innihalda hvorki Silikon eða Paraben, en það eru efni sem við ættum að reyna að forðast að setja í hárið á okkur eða á húðina. Paraben er rotvarnarefni sem notað er til að lengja líftíma snyrtivara og er í þeim langflestum - allt frá tannkremi, sjampói og yfir í farða. Var að renna yfir þessa grein hér áðan. Talið er að Paraben geti verið krabbameinsvaldandi svo eitthvað sé nefnt. 

 Hvet ykkur til þess að kíkja á vörurnar í baðskápnum ykkar og athuga efnisinnihaldið. Óþarfi er að henda öllu út, en góð hugmynd væri að reyna að finna vörur sem eru lausar við efnið þegar er komið að endurnýjun. 

Almáttugur. Afsakið, ég lagði ekki upp með að vera með efnafræðifyrirlestur í jólaalmanakinu. En, ég er farin að hugsa mikið um þessi mál og er á leiðinni að skipa smám saman út hjá mér. 

P.s. Það er eitt efni sem mér þykir sniðugra en annað í línunni - handáburður og hárefni í senn. Hversu mikil snilld er það? Ég þekki marga "handáburðafíkla" sem gætu vel þegið að geta kássast í hárinu á sér með nýja umferð af handáburði án þess að það líti út eins og smjörklípa. 

Þannig að strákar - já og stelpur, hér eru komnar flottar jólagjafahugmyndir, sem lykta ekki bara eins og dásamlegt kúlutyggjó, heldur fara betur með hár og húð. Tilvaldar undir jólatréð, nú eða til þess að gefa sveinka hugmynd að aðfangadagsgjöf í skóinn handa betri helmingnum.

Splæsið í "læk" á þessa til þess að vera með puttann á púlsinum fyrir jólin.

Já og þessa, til þess að panta klipp!

Jólaalmanak heimilisins - 2. desember

Byrjum þó á máli málanna. Afmælisbarninu!

Bríet er 12 ára í dag. Kjarnorkukonan sem hún er. Kallar ansi fátt ömmu sína. Nema þá kannski þegar hún á að læra heima í stærðfræði, já og þá eru kannski einhverjir allt aðrir ákallaðir. 

Hef oft sagt að ég myndi treysta Bríeti til þess að sjá eina um heimili, börn, buru og meðalstórt fyrirtæki í viku án þess að hafa áhyggjur. Í þarsíðustu viku kom það svo til tals að hún myndi kannski passa Emil í rúman hálftíma á mánudögum svo ég kæmist í ræktina. Já það hélt hún að væri nú minnsta málið!

Ég fór en var með símann hjá mér og var búin að árétta við hana að hringja um leið og henni þætti ástæða til. Mér barst engin hringing. Þegar ég kom heim og spurði hvernig hefði gengið svaraði hún; "Nú, bara mjög vel. Ég svæfði hann bara í sænginni þegar hann var orðinn pirraður." Já auðvitað. Hvað var ég að mikla þetta fyrir mér?

Þessi var tekin í dag þegar Emil gaf systu afmælisknús.

Elsku besta, duglega Bríetin okkar, innilega til hamingju með daginn þinn!

2. desember 

Í dag kveikum við á fyrsta aðventukertinu og margir hafa fyrir sið að vera með kaffiboð fyrir fjölskylduna (vinina) til að halda upp á að jólafastan er byrjuð og komast í jólastemmningu. 

-------

Já. Hér er einhver ruglingur milli ára, en þarna í denn hefur 2. desember borið upp á sunnudag. Ég, eins og flestir landsmenn, tendraði spádómskertið síðstliðinn sunnudag. Mitt kaðlaprjónaða aðventukerti úr sænska himnaríkinu, IKEA. 

Okkar aðventukaffiboð verður svo haldið hátíðlegt næsta sunnudag þegar við bjóðum ættingjum og vinum (ekki innan sviga) að koma í B10 og úða í sig allskyns kruðeríi, Bríeti til heiðurs. 

Ég hugsa að það verði svo að vera verkefni vikunnar að laga þetta stórslys sem ég ældi á svefnherbergisgluggann síðustu helgi. Eða hvað?

Jólaalmanak heimilisins - 1. desember

Jólaalmanak húsmóðurinnar birtist fyrst í dagblaðinu Vísi í desember 1968. Vegna mikilla vinsælda var það endurútgefið í sama blaði ellefu árum síðar, þá undir nafninu Jólaalmanak heimilisins. Haft var eftir Guðmundu nokkurri Halldórsdóttur að þarna væri komið ákveðið aðhald - auk þess sem gaman væri að fara eftir ákveðinni formúlu við jólaundirbúninginn. 

Ég ætla að freista þess að upplýsa hér, hvernig skynsamlegast er að haga undirbúningi jólanna dag frá degi í desember. Já og veita ykkur aðhald. Svona ef ég nenni. 

1. desember

Frá og með deginum í dag erum við minnt á það daglega að jólin nálgast hraðbyri, því nú birta blöðin með stórum tölustöfum hve margir dagar eru til jóla. Gott er að athuga fatnað fjölskyldunnar - kaupa, sauma eða koma í hreinsun því sem þarf. Og í dag opna börnin fyrsta daginn í jólaalmanakinu. 

------

Þarna er ég nokkuð á pari. Börnin komin með jólafötin og sjálf gerði ég gríðarlega góð kaup að eigin mati í gær, fjárfesti í tveimur notuðum en frábærum kjólum á samtals 2500 krónur. Vel gert. Hér sést í annan þeirra - þið viljið ekki mæta mér í myrkri.

Í dag fór ég þó aðeins út fyrir efnisinnihald almanaksins og bakaði mömmukökur. Eins og fram hér í fyrra hef ég átt óskaplega bágt með að henda reiður á hvar ég læt frá mér miðana sem ég pára á uppskriftir, sem oftar en ekki eru innkaupastrimlar úr Bónus eða gluggaumslög. Í ár fór ég því örugguleiðina og framkvæmdi verknaðinn í móðurhúsum, en við Emil tókum daginn snemma og brunuðum á Stöðvarfjörð. 

Hér má sjá svipmyndir frá deginum.

Ég drekk kaffið mitt alltaf úr glasi heima hjá mömmu. Ekki af því hún býður mér ekki bolla. Nei, bara af því mér finnst það bara betra. 

Skelltum okkur aðeins út í góða veðrið í smá myndatöku. Vera aaa við grenitréð...

Skemmtilegur dagur. 

Það er svo afar spennandi að sjá hvort við fylgjum áætlun á morgun. En þá á heimasætan okkar 12 ára afmæli.

Sko. Ef þið viljið vera með á nótunum og gera réttu hlutina á réttu dögunum, þá hvet ég ykkur til að læka þessa.